Ráðstöfunartekjur heimilanna jukust um 9,2% árið 2022 samkvæmt bráðabirgðaniðurstöðum borið saman við fyrra ár. Ráðstöfunartekjur á mann námu rúmlega 4,9 milljónum króna á árinu 2022 og jukust um 6,5% frá fyrra ári. Þá er áætlað að kaupmáttur ráðstöfunartekna heimila á mann hafi dregist saman um 1,7% á sama tímabili.
Áætlað er að ráðstöfunartekjur heimilanna hafi aukist um 9,1% á fjórða ársfjórðungi 2022 borið saman við sama tímabil fyrra árs en áætlað er að ráðstöfunartekjur á mann hafi numið rúmlega 1,25 milljónum króna á ársfjórðungnum og hafi aukist um 5,8% frá sama tímabili 2021. Að teknu tilliti til verðlagsþróunar er áætlað að kaupmáttur ráðstöfunartekna á mann hafi dregist saman um tæp 3,4% á tímabilinu en vísitala neysluverðs hækkaði um 9,4% á sama tímabili.
Aukning í launatekjum heimilanna
Heildartekjur heimilanna jukust árið 2022 um 9,9% frá fyrra ári. Sá liður sem þyngst vegur í hækkun á heildartekjum heimilanna eru launatekjur sem áætlað er að hafi aukist um ríflega 260 milljarða frá fyrra ári eða sem nemur 15%. Á sama tímabili jukust skattar á laun um ríflega 27 milljarða eða um rúmlega 5,5%. Aukning launatekna skýrist bæði af launahækkunum og minnkandi atvinnuleysi. Samkvæmt launavísitölu Hagstofu Íslands hækkuðu laun að meðaltali um 8,3% á árinu 2022 borið saman við fyrra ár en starfandi einstaklingum fjölgaði um 7% á sama tímabili.
Áætlað er að vaxtagjöld heimila hafi aukist um 35,5% á árinu 2022 borið saman við fyrra ár sem skýrist bæði af auknum útlánum til heimila og hærri vöxtum. Á sama tímabili jukust eignatekjur heimila um 16% en áætlað er að vaxtatekjur heimila hafi aukist um 52,8% á tímabilinu.
Heildartekjur heimilanna jukust um 9,1% á fjórða ársfjórðungi 2022 samanborið við sama ársfjórðung fyrra árs en þar af jukust launatekjur um 13,9% og eignatekjur um 14%. Heildargjöld heimilanna jukust um 9% á fjórða ársfjórðungi 2022 samanborið við sama ársfjórðung í fyrra en þar af jukust skattar á laun um 4,1% og vaxtagjöld um 54%.
Aukningu vaxtagjalda og vaxtatekna má rekja til aukins fjármagnskostnaðs heimilanna og mikilla stýrivaxtahækkana á tímabilinu.
Lífeyristekjur og félagslegar tilfærslur drógust saman um rúm 1,3% á milli ára
Áætlað er að lífeyristekjur og félagslegar tilfærslur til heimilanna hafi dregist saman um 6,8 milljarða króna frá fyrra ári sem nemur rúmlega 1,3% minnkun á milli ára.
Lífeyristekjur og félagslegar tilfærslur námu 15,1% af heildartekjum heimilanna árið 2022 samanborið við 16,8% árið 2021 og 17,3% árið 2020.
Tryggingagjöld atvinnurekenda og launafólks heimilisgeirans jukust um 14,8% samanborið við 8% samdrátt á árinu 2021 sem má að einhverju leyti rekja til þess að tryggingagjald lækkaði úr 6,35% í 6,1% árið 2021 en hækkaði aftur í 6,35% árið 2022.
Lífeyristekjur og félagslegar tilfærslur drógust saman um rúm 0,5% á fjórða ársfjórðungi 2022 borið saman við sama ársfjórðung 2021 og námu 14,6% af heildartekjum heimilanna á ársfjórðungnum. Tryggingagjöld atvinnurekenda og launafólks heimilisgeirans jukust um 14,6% á ársfjórðungnum samanborið við sama ársfjórðung 2021.
Ofangreindar niðurstöður eru skilgreindar sem bráðabirgðaniðurstöður en Hagstofan mun birta endurskoðaðar niðurstöður þegar fyrir liggja endanlegri upplýsingar, meðal annars úr skattframtölum fyrirtækja og einstaklinga.